Қозғалыс барысында телефон пайдаланған қоғамдық көлік жүргізушілеріне айыппұл салынады

Алматы облысының тәртіп сақшылары жүргізген «Автобус» жедел алдын алу іс-шарасы барысында үш күн ішінде 64 жүргізуші жолаушылар тасымалдайтын қоғамдық көлікті тізгіндеу кезінде телефонды пайдаланғаны үшін әкімшілік жауапкершілікке тартылды,- деп мәлімдеді облыстық полиция өкілдері.

Ведомствоның айтуы бойынша, тұрғындар әлеуметтік желілер арқылы немесе полиция басшылығының атына хат жазып, автобус жүргізушілерінің қозғалыс барысында телефон пайдаланатынын, осы арқылы жолаушылар өміріне қауіп төндіретіні туралы мәлімдеген. Сондай-ақ, жолаушылар тасымалдайтын көліктердің жол-көлік апатына ұшырауының себеп-салдарын зерделеу барысында апаттық сәтте жүргізушілердің назары жолда болмауының деректерін кездестіруге болады.

«Қоғамдық көліктер тарапынан жол жүру ережелерін бұзуды болдырмау, жолаушылардың қауіпсізідігін қамтамасыз ету мақсатында желтоқсан айының 3-9 күндері Алматы облысы аумағында «Автобус» жедел-алдын алу іс-шарасы өткізілуде. 3 күн ішінде қоғамдық көлік тізгіндеген жүргізушілер тарапынан жол жүру ережесін бұзудың үш жүзге жуық дерегі тіркелген. Оның ішінде, алпыс төрт жүргізушіге жол жүру барысында телефон пайдаланғаны үшін хаттама толтырылып, әкімшілік айыппұл салынды»,- деп атап өтті ведомстводағылар.

Өз кезегінде, тәртіп сақшылары көлікті басқару кезінде жүргізуші назарын басқа жаққа аударатын заттарды, әсіресе, телефонды пайдалану көліктегі адамдар үшін де, жаяу жүргіншілердің өмірі үшін де өте қауіпті екенін ескертеді.

Сондай-ақ, ҚР Әкімшілік құқық бұзушылық туралы кодексінің талаптарына сәйкес көлiк құралын басқару кезiнде жүргiзушiнiң телефонды не радиостанцияны пайдаланғаны үшін алғаш рет 12 025, ал бір жыл ішінде қайталаса 24050 теңге айыппұл салынатынын еске салады.

Дереккөз: zakon.kz

 

Пікір үстеу

Э-пошта мекенжайыңыз жарияланбайды. Міндетті өрістер * таңбаланған